26 locais e 37 propostas para unha nova edición de Sanxenxo Degusta Tapas

26 establecementos do municipio participarán desde este venres 22 de maio até o 7 de xuño nunha nova edición de Sanxenxo Degusta Tapas.

O concelleiro de Turismo, Juan Deza, presentou este xoves a décimo quinta edición do certame no Pazo de Quintáns, acompañado por representantes do sector hostaleiro, que acudiron con algunhas das propostas que poderán degustarse durante o evento.

A cita, xa consolidada no calendario local, ofrecerá un total de 37 tapas, 17 tradicionais e 20 creativas, que durante dúas semanas veciños e visitantes poderán degustar por un prezo de 4 euros, sen consumición incluída.

O público poderá participar nas votacións e nos sorteos recollendo un Degusta Mapa en calquera dos establecementos adheridos. Cada consumición se validará cun selo e, ao alcanzar cinco, poderase optar a diferentes premios.

Entre eles, destacan estancias en Sanxenxo, pases de spa ou paseos en veleiro. Ademais, os primeiros en completar a ruta gastronómica poderán gañar unha comida ou cea para dúas persoas nos locais participantes, até esgotar existencias.

Con motivo do décimo quinto aniversario, os restaurantes gañadores recibirán 300, 200 e 100 euros nas distintas categorías que deberán destinar a compras nas prazas de abastos de Sanxenxo e Portonovo, co obxectivo de fomentar o uso de produto local e de calidade.

Nesta edición participan A Codia, Fonte da Vella, A Taberna da Confradía, Aldea Calma/As Suculentas, Arrocería Bica do Río, Asador Rosendo, Cervecería Azor, Cervecería El Aviador, Cervecería El Puerto, El Puente, Esencia Nosa by Salgadoiro, Gastrobar La Cueva, Hotel Riveiro, La Mar Brava, La Rectoral, Mar do Pintor, Marlima II, O Buraco, O Risonsiño, O Vasko, Pepa Loba, Restaurante El Pescador, Restaurante Xerfa, Taberna Bateam, Taberna Lilaina e Terraza del Mar.