55 empresas reciben distintivos de calidad Sicted en la primera Gala Turismo de Sanxenxo

O Pazo de Quintáns acolleu a I Gala de Turismo de Sanxenxo, un encontro institucional organizado para escenificar a entrega dos distintivos do Sistema Integral de Calidade Turística Española en Destinos (Sicted).

Durante o acto, un total de 55 establecementos e entidades do municipio recolleron a certificación, que require unha renovación bianual. Con esta cifra, o Concello mantén a maior representación de empresas adheridas a este programa de Turespaña e da Federación Española de Municipios e Provincias (FEMP) dentro de Galicia.

O evento estivo presidido polo alcalde Telmo Martín e contou coa participación do director de Turismo da Xunta de Galicia, Xosé Manuel Merelles; o presidente da Sociedade Mercantil Estatal para a Xestión da Innovación e as Tecnoloxías Turísticas (Segittur), Enrique Martínez; e o deputado provincial, Javier Tourís.

Durante a súa intervención ante os asistentes, o rexedor expuxo: "é un orgullo ver este edificio cheo de talento, esforzo e de persoas que comparten unha mesma visión: Facer de Sanxenxo un destino único ao que querer volver".

Martín engadiu que "levamos máis de dúas décadas liderando a calidade turística a nivel nacional. Fomos pioneiros en entender que o turismo non consiste só en ter as mellores praias ou o mellor clima; consiste, por riba de todo, en ofrecer un servizo excelente, profesional e sustentable".

DEGUSTA TAPAS

A programación da gala incluíu a concesión dos galardóns correspondentes á décimo quinta edición do certame culinario Degusta Tapas.

No apartado de cociña tradicional, o primeiro premio correspondeu ao establecemento O Vasko pola súa elaboración "Tierra y Mar"; o segundo posto obtívoo A Batea coa proposta "Ajo y agua"; e o terceiro recaeu no Restaurante Xerfa con "A mordida do mar".

Na modalidade de cociña creativa, o xurado outorgou o primeiro lugar a O Buraco pola tapa "Zorza do mar con emulsión de jalapeños y caviar de cítricos".

A segunda posición foi para o Restaurante Xerfa con "Marea Perfecta", mentres que o terceiro recoñecemento foi para La Mar Brava polo seu prato "Hand Roll Ika".