Gastronomía e música déronse a man no Pazo da Cultura de Pontevedra durante a noite deste luns organizado por oito cociñeiros do Grupo Nove que ofrecían tapas solidarias para recadar diñeiro para a asociación PROEM-AID, bombeiros da Illa de Lesbos.
Os cociñeiros Pepe Solla, Javier Oleiros, Iñaki Bretal, Eduardo Prado, Álvaro Villasante, Héctor López, Antonio Botana e Roberto Filgueira elaboraron tapas sorprendentes como a de atún en agridoce de pemento, rabo de vaca de Bandeira con castañas, pescado de baixura encurtido con vinagreta de tomate seco ou a vieira marinada, lima e soia.
Centos de persoas achegáronse ata o vestíbulo do Pazo da Cultura, que tamén contaba cun espazo para acoller as actuacións musicais a cargo de Nicolás Pastoriza, o cociñeiro Pepe Solla e o catador Juanjo Figueroa Treus, nunha maridaxe especial entre o mundo da alimentación e o musical.
Ademais, o fotógrafo Óscar Vifer presentaba a súa exposición "Dinghy" sobre a viaxe que realizara aos campos de refuxiados de Grecia.
Todas as persoas que non puideran asistir pero queiran colaborar axudando aos refuxiados en lesbos poden facer os seus donativos a través da Fila Cero habilitada na conta da asociación ES49 1491 0001 2021 75491022.
Durante esta sesión recadáronse 6.135 euros.