En pouco máis de dous minutos, pasadas as doce da mañá, liquidou a Deputación de Pontevedra o último pleno deste mandato nunha sesión que, como é preceptivo, procédese a aprobar a acta da anterior convocatoria plenaria. Con iso queda disolta a corporación provincial.
Non houbo discurso de despedida nin intervención algunha pois todo limitouse cumprir co trámite que pecha o mandato da presidenta provincial Carmela Silva.
Iso si, non faltaron a foto de despedida da corporación saínte nin os saúdos cordiais de quen foi durante o últimos catro anos compañeiros nesta administración provincial.
En tres días terá lugar neste mesmo salón outro pleno, o de constitución da nova corporación da Deputación de Pontevedra que foi fixado á mesma hora, ás doce do mediodía, e no que será elixido o popular Luís López como trixésimo sexto presidente da institución substituíndo no cargo á socialista Carmela Silva.
Nos últimos días o vicepresidente da Deputación en funcións e portavoz do BNG, César Mosquera e o deputado portavoz do PSdeG-PSOE en funcións Carlos López Font entregaron á delegación popular toda a documentación dos proxectos e programas que está a desenvolver actualmente o goberno provincial nun dossier de 300 folios con toda a información detallada das 27 áreas de servizo, co fin de que o goberno entrante poida tomar así as decisións que considere convenientes.