A Festa do Albariño chega disposta a saciar a sede durante a vaga de calor deste inicio de agosto

O Consello Regulador da Denominación de Orixe Rías Baixas espera distribuír ao redor de 35.000 copas durante a celebración da LXVI Festa do Albariño de Cambados, que se inauguraba oficialmente este mércores no Paseo da Calzada.

44 adegas teñen presenza neste evento nas 42 casetas instaladas no céntrico paseo polo que miles de persoas citaranse co viño albariño durante unhas xornadas marcadas por altas temperaturas nun arranque do mes de agosto que virá acompañado por unha onda de calor. Un dato que destacou a alcaldesa, Fátima Abal, durante a inauguración esperando un gran ambiente durante os próximos días de celebración da festa de interese turístico galego e nacional.

A presidenta da Deputación, Carmela Silva, destacou que Merchi Álvarez, unha veciña cambadesa presidenta da Asociación GaliciAME, fóra a persoa elixida pola organización para ler o pregón desta edición. Trátase da primeira vez en que unha muller encárgase deste acto.

Carmela Silva sinalou que é a festa "máis feminista da historia" deste acontecemento e destacou tamén que as Rías Baixas contan co mellor veu branco do mundo, que conta cada vez cun maior recoñecemento internacional. Tamén apuntou que nesta edición se incorpore un punto morado para loitar contra as agresións sexuais que sofren as mulleres, ademais do consumo sustentable. A subdelegada do Goberno, Maica Larriba, achegábase por este posto na súa visita á festa cambadesa.

Ao acto asistiu tamén a conselleira de Medio Rural, Ángeles Vázquez, que destacaba a proxección nacional e internacional desta cita. Tamén o presidente do Consello Regulador da D.O. Rías Baixas, Juan Gil de Araujo, quixo referirse ao traballo desenvolvido por miles de viticultores e adegas para mellorar a materia prima e elaborar viños cada vez de maior calidade.

A oferta de actividades prolóngase ata o domingo 5 de agosto, coa posta en marcha do VIII Túnel do Viño Rías Baixas e as V Catas Temáticas organizadas no Salón de Congresos e Exposicións José Peña de Cambados. Inaugurarase este xoves ás 13.00 horas coa presenza do vicepresidente da Xunta, Alfonso Rueda.

Neste espazo, os visitantes poderán degustar 161 marcas de 60 adegas da D.O. Rías Baixas por un prezo de 15 euros. Ao mesmo tempo, once adegas protagonizarán 12 catas temáticas, que terán lugar desde o xoves ata o domingo. A organización agarda un récord de visitas superando as 35.000 copas tras os cinco días de celebración.