Tres socorristas prestarán os seus servizos durante o verán na praia da Calzada, primeira zona de baño destas características en España galardoada coa Bandeira Azul.
Os socorristas tiveron que superar unha proba teórica e outra práctica de salvamento realizada na propia zona de baño da praia fluvial supervisada por técnicos do Concello que realizaron o exame.
O contrato destes tres socorristas enmárcase dentro do programa de fomento do emprego e mellora da empregabilidade no ámbito de colaboración das entidades locais para a contratación de traballadores desempregados, que conta cunha subvención da Consellería de Traballo e Benestar.
Os socorristas percibirán un salario dentro do convenio colectivo de instalacións deportivas e ximnasios da Comunidade Autónoma de Galicia e a súa duración dependerá da resolución da concesión de subvención por parte da Consellería de Traballo e Benestar.
En principio o alcalde, Andrés Díaz, manifestou que o desexo do equipo de goberno é manter a presenza continuada e por quendas desde o 1 de xullo ata o 31 de agosto, como obriga ADEAC pola concesión da Bandeira Azul.
Andrés Díaz sinalou que o compromiso do Concello de Ponte Caldelas coa Bandeira Azul e co medio ambiente é unha cuestión "irrenunciable" e manifestou que a dotación de tres socorristas para esta praia é unha "aposta clara pola seguridade e a mellora de instalacións e servizos" que está a impulsar o equipo de goberno na área recreativa da Calzada e toda a súa zona de baño.