"Queres traballar de socorrista na praia fluvial da Calzada?" é a pregunta que lanza o alcalde de Ponte Caldelas, Andrés Díaz, nas redes sociais para animar a todas aquelas persoas que cumpran os requisitos para presentarse á selección de persoal que se realizará a próxima semana.
As condicións que se establecen este ano céntranse nun contrato do 15 de xuño ao 15 de setembro en xornada completa. O salario líquido que percibirán as persoas seleccionadas é de 1.249 euros ao mes.
O Concello de Ponte Caldelas lembra que para participar na selección é preciso anotarse no INEM.
Tamén se esixirá estar en posesión do título de Socorrista en Espazos Acuáticos Naturais e permanecer rexistrado no Rexistro Profesional de Socorristas Acuáticos.
A praia fluvial da Calzada conta con bandeira azul. No caso de que non se atopen as tres persoas demandadas que se encarguen do servizo de socorrismo, o Concello veríase obrigado a renunciar á bandeira azul.