A Semana Santa entrou na súa recta final en Pontevedra. Fíxoo, como é habitual nas mañás do Venres Santo, coa tradicional procesión do Encontro, no que participaron centos de persoas.
Foi a primeira das dúas procesións previstas para esta xornada.
Ás nove da mañá saíu o paso da Virxe da Soidade da igrexa de San Bartolomé e o paso de Cristo coa Cruz ao lombo da basílica de Santa María, para atoparse na praza do Teucro.
Tras ese encontro na cuarta estación do Vía Crucis, cada paso regresou á súa igrexa de orixe, levados por homes e mulleres, respectivamente.
Á fronte desta procesión, como sempre, estiveron as confrarías de Vera Cruz y Misericordia e de Nuestro Padre Jesús con la Cruz a cuestas.
A partir das oito da tarde será a quenda da procesión xeral do Santo Enterro, que tras saír de Santa María realizará o percorrido habitual pola praza España, Riestra, Oliva, García Camba, Peregrina, Soportais, Manuel Quiroga, Don Filiberto, Alhóndiga para concluír, de novo, na avenida de Santa María.