Maica Larriba, subdelegada do Goberno, inauguraba este xoves a xornada divulgativa na que se presentan as liñas de apoio do Goberno do Estado ás vítimas da violencia de xénero. Durante a súa intervención alertou sobre a cifra de mulleres da provincia que son destinatarias destes programas.
Segundo indicou, a día de hoxe a provincia conta con 1.304 casos en seguimento de violencia de xénero. Pero ademais, Maica Larriba mostrou a súa preocupación ao comprobar como "a nivel xeral a violencia machista crece entre a poboación máis nova". Debido a esta situación, a representante gobernamental manifestou que "mentres isto sucede temos que soportar desde o máximo rexeitamento e indignación como algúns sectores da política tratan de restar peso a esta secuela ou directamente négana".
Maica larriba: "a nivel xeral a violencia machista medra entre a poboación máis nova"
A subdelegada afirmou que é fundamental que as profesionais que traballan no campo de apoio ás vítimas coñezan e divulguen as axudas e dereitos que lle corresponden ás mulleres que son vítimas da violencia de xénero. Nesta liña, anunciou a creación de servizos de atención integral 24 horas para as vítimas de violencia de xénero grazas aos 5 millóns de euros que o Ministerio de Igualdade transferiu á Xunta de Galicia e que permitirán a construción de catro centros, un por provincia, dentro do Plan denominado 'España te protege'. Segundo avanzou, está previsto que os centros se atopen en funcionamento en 2023.
Tamén especificou que o Plan Estatal de Vivenda inclúe axudas para a compra de vivendas destinadas ás vítimas; ademais está en marcha o programa para formar e inserir laboralmente con compromiso de contratación a mulleres vítimas de violencia de xénero, que permite ás beneficiarias cobrar axudas directas de entre 500 e 960 euros mensuais, á vez que reciben apoio para a súa inserción.
Larriba lembrou tamén o compromiso do goberno de Pedro Sánchez na loita contra esta violencia ao destinar 60 millóns de euros a Galicia, entre 2018 e 2022 dentro do Pacto de Estado contra a violencia de Xénero e outros programas a favor da igualdade.
O salón de actos da Subdelegación do Goberno en Pontevedra acollía este acto que contou coa presenza de Beatriz Alonso, xefa da área de prestacións na oficina do Servizo Público de Emprego de Pontevedra; e de María Belén Pérez, directora do Centro de Atención e Información da Seguridade Social de Vigo oeste, entre outras autoridades e integrantes dos Centros de Información á Muller de distintas localidades.