As obras de reforma da praza Pintor Arturo Souto, no ámbito de Loureiro Crespo, avanzan a pleno rendemento.
Na actualidade xa está levantado todo o pavimento e foi retirada a plantación de laranxeiras que serán transplantadas a outra zona da cidade, xa que non se consideraba a árbore máis acaída para un lugar sombrío.
A intervención pretende trasladar os estándares de calidade urbana a esta zona da cidade e acabar cos importantes problemas de accesibilidade que tiña toda a praza, que evitaba que fose empregada polos veciños.
A proposta consiste na creación dunha plataforma única na que se elimina o carril de circulación actual que bordea toda a praza. Logo da reforma, os vehículos poderán acceder tendo en conta que a prioridade sempre será do peón.
A obra completarase con novo mobiliario urbano e con novas plantacións máis apropiadas para este espazo urbano.
Esta actuación completará a reforma urbana realizada na rúa Loureiro Crespo, no tramo comprendido entre a praza do Hospital e a rotonda de Doce de novembro.