Representantes da Asociación de Nais e Pais de alumnos e o director do colexio Froebel mantiveron unha reunión co xefe territorial de Educación, César Pérez Ares, para coñecer cando finalizará a reforma integral do centro educativo despois de que as obras leven dous anos paradas.
Os pais mostraron a súa decepción ao termo do encontro celebrado na Delegación da Xunta porque o responsable de Educación non puxo data ao momento en que se realizarán as obras pertencentes á fase C, que levan consigo a reparación do último tramo da cuberta que afecta á fachada de Concepción Areal e á parte que cobre o patio.
César Pérez, segundo indicou o director do centro, Manuel Carpintero, apuntou que a fase B, que estaba prevista para o verán de 2014, se levará a cabo entre finais de 2015 e 2016. Estas obras levan consigo o remate das obras de carpintaría, o cambio de ventás e o arranxo de armarios.
Pero tantos estes traballos como os da última fase, segundo explicou o responsable de Educación aos representantes da ANPA, non resultan prioritarios. Segundo os expuxo César Pérez, agora os principais investimentos estanse a destinar aos centros de formación profesional e sinalou que o orzamento das obras da fase C ascende a un millón de euros. O xefe territorial visitou, antes da xuntanza, as instalacións, segundo apuntou Manuel Carpintero.
Dende a ANPA anuncian que manterán unha reunión con todos os pais para decidir se inician un calendario de protestas ou se esperan a que se cumpran coas promesas da execución das obras.
En 2010 derrumbáranse planchas do falso teito en dúas aulas do CEIP Froebel durante a clase e, dende aquela, os pais veñen manifestando o seu malestar porque, en época de chuvias, entra auga nalgúns espazos do centro.