A directora xeral da Axencia Galega de Desenvolvemento Rural, Inés Santé, mantivo este venres unha reunión por videoconferencia co alcalde de Cerdedo-Cotobade, Jorge Cubela, para abordar o proxecto senlleiro "Mellora do parque etnográfico", que se levará a cabo neste concello cunha subvención de 24.780 euros por parte da Consellería do Medio Rural.
Os traballos que se van acometer mediante o convenio de colaboración consistirán no acondicionamento da contorna e na limpeza manual das principais estacións de gravados rupestres de Cerdedo-Cotobade.
Cómpre sinalar que algúns destes elementos recollen imaxes de gran valor e moitos deles -pola súa localización e extensión- son dos máis representativos desta época. Neste senso, tamén se incluirá a instalación de elementos delimitadores de afluencia que sirvan como disuasorios e protectores do xacemento.
Así, en concreto actuarase na Pedra das Ferraduras, na Laxe dos Cebros e na Portela das Rozas Vellas, no marco do conxunto de Fentáns que acolle preto de 300 petróglifos. A maiores, beneficiarase do convenio a Laxe das Rodas e o grupo de Lombo da Costa, en San Xurxo e Santa María de Sacos; así como a Laxe do Cuco e Portela da Cruz, en Cernadelo, San Xurxo de Sacos.
As actuacións proxectadas están concibidas para estar rematadas neste ano 2021.
Engade Pontevedra Viva como fonte preferida de Google de balde
Mantente informado coas últimas noticias de actualidade.