Máis de trescentas persoas participaron na presentación da candidatura coa que o BNG intentará reter, por terceiro mandato consecutivo, a Alcaldía de Barro.
O alcalde, Xosé Manuel Fernández Abraldes, volverá a encabezar unha lista coa que buscará obter os mellores resultados posibles para "que Barro poida seguir crecendo e avanzando e asegurar así que non sufra un retroceso", segundo subliñou na cea celebrada este sábado.
"O Barro de hoxe pouco ten que ver co Barro triste e apagado que había antes", destacou Fernández Abraldes, que defendeu o traballo realizado polos nacionalistas para "dárlle a volta un concello endebedado e sen futuro e convertelo nun concello modelo e referente".
O equipo que acompañará ao alcalde nestas novas eleccións municipais mestura a renovación coa continuidade do bloque que gobernou estes últimos catro anos.
Así, tras o actual alcalde irán os outros cinco membros do goberno, María Rocío Martínez Sartal, Roberto Rivas Reboredo, Amelia Cancela Cancela, Iván Bello Ferreiro e Adrián Silva Magdalena.
A lista dos once membros complétase con Andrea Pérez Cal, Eva Paredes Poza, Cristina Silva Martínez, Xavier Monteagudo García e Xan Rey Durán.
Abraldes cualificou a candidatura como un equipo "espectacular, moi diverso e con moita capacidade" e asegurou que "estou seguro de que escribirá as mellores páxinas da historia de Barro".