AJE Pontevedra e ENCE presentaron este luns a sexta edición da Aceleradora Ría de Pontevedra, un programa dirixido a impulsar o emprendemento nos municipios de Pontevedra, Marín e Poio.
O acto de presentación contou coa participación do presidente da Asociación de Jóvenes Empresarios de Pontevedra, Carlos Fontán; o director territorial de ENCE en Galicia, Antonio Casal; e Ramón Tubío, responsable da consultora encargada do programa de formación, mentoría e acompañamento ás persoas participantes.
A nova convocatoria está destinada tanto a persoas emprendedoras como a empresas cun máximo de tres anos e medio de actividade.
O prazo de inscrición abrirase este martes 12 de maio e permanecerá activo ata o 29 de maio de 2026.
Durante o acto, Antonio Casal destacou o compromiso de ENCE co emprendemento local e lembrou que pola aceleradora xa pasaron 61 proxectos desde a súa creación. "Esta aceleradora vén dar unha idea do enorme apoio que este proxecto ten para o emprendemento nas zonas de influencia en Pontevedra, Poio e Marín", sinalou.
Casal subliñou ademais a continuidade do respaldo da compañía ás iniciativas empresariais da comarca.
Pola súa banda, Carlos Fontán puxo o foco no valor do acompañamento aos emprendedores e na colaboración entre entidades públicas e privadas. "Hoxe presentamos unha oportunidade real para emprender mellor", indicou o presidente de AJE Pontevedra, quen defendeu que "emprender non é un camiño en solitario".
Fontán, que participou persoalmente na cuarta edición da aceleradora, asegurou que os resultados "avalan" o programa e destacou que o 100% dos proxectos da última edición continúan activos. "Iso significa que estamos a construír empresas con capacidade real de manterse, evolucionar e achegar valor", sinalou.
O presidente de AJE tamén incidiu na importancia da conexión territorial e da economía circular para fortalecer a competitividade da ría de Pontevedra. Así mesmo, animou a emprendedores e empresas emerxentes a presentar as súas iniciativas ao programa.
Ramón Tubío destacou que a aceleradora presenta unha taxa de supervivencia de proxectos "que triplica o habitual" neste tipo de iniciativas. Segundo explicou, o obxectivo é dar resposta aos retos que afrontan os emprendedores durante os seus primeiros 42 meses de actividade.
"Alongamos bastante o prazo ata os tres anos e medio para dar cabida a proxectos en distintas fases ata chegar á súa consolidación. E unha vez que os proxectos están consolidados, seguimos apostando por eles", explicou Tubío.
O programa ofrecerá ás iniciativas seleccionadas un itinerario integral de apoio empresarial. Entre os seus contidos inclúense formación especializada en metodoloxías de emprendemento, mentorías personalizadas adaptadas ás necesidades de cada proxecto e acceso a posibles vías de financiamento a través dun "Demo Day", unha xornada orientada á presentación das propostas ante investidores e axentes do ecosistema emprendedor.
As persoas participantes tamén poderán integrarse nas actividades impulsadas por AJE Pontevedra, co obxectivo de favorecer a creación de redes de contacto, o intercambio de experiencias e a xeración de sinerxías entre empresas emerxentes e tecido empresarial consolidado.
A aceleradora céntrase especialmente en proxectos sostibles e innovadores relacionados con sectores estratéxicos para a comarca, como o turismo, o comercio, a cultura, a agricultura, a pesca, o marisqueo ou o medio ambiente.