A área sanitaria de Pontevedra-O Salnés xa puxo en funcionamento un sistema tecnolóxico de xestión de quendas no servizo de Urxencias do Hospital Montecelo.
O obxectivo desta medida é ordenar os fluxos de chegada de pacientes adultos que requiren atención médica neste servizo do hospital.
O procedemento iníciase na área de admisión de Urxencias, onde as persoas deben introducir a súa tarxeta sanitaria. Nese momento, o dispositivo imprime un resgardo cun código personalizado e o turno correspondente.
A partir dese paso, o paciente intégrase nun programa que coordina as chamadas para acceder.
Nas pantallas situadas nas salas de agarda van aparecendo os códigos xunto coa indicación da sala ou box concreto ao que a persoa debe dirixirse para recibir a asistencia.
O avance desta listaxe acompáñase dun aviso sonoro para alertar aos usuarios.
A implantación deste método, segundo a Xerencia, elimina o uso dos nomes e apelidos dos pacientes en voz alta no momento de chamalos.
A intención é garantir a protección de datos e a confidencialidade.
Doutra banda, o sistema, segundo o Sergas, facilita a localización dos espazos de consulta e permite que os usuarios coñezan en todo momento o estado de avance das quendas.
Evítase así a incerteza de agardar á chamada para ser atendidos e tamén o proceso de avisar cando chega o paciente.