Alternativa Galega de Esquerda (AGE) pregunta no Parlamento de Galicia polos controis de vertedura na desembocadura do emisario submarino da Estación Depuradora de Augas Residuais dos Praceres. A pregunta, recollida pola Mesa da Cámara galega, persegue unha resposta sobre a periodicidade, os parámetros e a publicación destes controis.
Ademais os deputados de AGE interésanse por coñecer "por separado", que controis sofren tanto Elnosa coma Ence e a propia EDAR das verteduras de cada unha, antes de entrar no colector xeral submarino que parte da depuradora.
Antón Sánchez García, deputado de AGE, recordou que a ría de Pontevedra, ten pendente o saneamento integral, "o mesmo debería de ser cuestión prioritaria xa que existen focos de contaminación destacando pola súa repercusión os que manteñen a cualificación de zona C para ou marisqueo, debido á contaminación por fecáis", explica.
Para a formación nacionalista, o problema localízase "nun incompleto tratamento dos verquidos domésticos na EDAR dos Praceres e por outra banda o complexo industrial Ence-Elnosa, que utilizan no seu conxunto o mesmo emisario submarino da depuradora como saída a Ría de Pontevedra trala Illa de Tambo".
Para solucionar este problema, asegura Antón Sánchez, "é preciso determinar con precisión a magnitude destas dúas vertentes do problema, xa que existen numerosas dúbidas sobre a orixe da contaminación".
Engade Pontevedra Viva como fonte preferida de Google de balde
Mantente informado coas últimas noticias de actualidade.