A partir do vindeiro martes, 1 de xullo, xa se pode solicitar praza para a denominada Semana Máxica de Poio, prevista para o mes de agosto.
Trátase dunha iniciativa lúdica e educativa que, un verán máis, ofrece á rapazada de Poio a oportunidade de participar nun campamento con aloxamento, xogos, obradoiros, excursións e veladas nocturnas.
A actividade é de carácter gratuíto, pois está subvencionada integramente polo Concello.
Está pensada para rapaces e rapazas que cursen quinto e sexto de Primaria ou primeiro e segundo curso da ESO.
Desenvolverase en dúas quendas de 25 prazas cada unha na escola de Tarrío, en Samieira.
A primeira quenda, para alumnado de primaria, terá lugar do 4 ao 6 de agosto; a segunda, dirixida á mocidade de secundaria, será do 6 ao 8 de agosto.
O prazo para inscribirse abre este martes, 1 de xullo, a través da sede electrónica do Concello de Poio ou de xeito presencial no rexistro xeral da Casa do Concello.
Xunto co formulario de inscrición, deberán presentar copia do DNI da persoa participante, e calquera outra documentación relevante sobre datos médicos ou situacións familiares que sexa preciso coñecer para garantir o bo desenvolvemento da actividade.
A lista de admitidos e de reserva publicarase o xoves 17 de xullo.
A concelleira de Mocidade, Tamara González, e o edil de Deportes, Tucho Muíños, presentaron a iniciativa.
Tamara González destacou que "o verán é tempo de facer amizades, de compartir e de vivir experiencias únicas" e esta Semana Máxica é unha proposta do Concello para que a rapazada goce "dun verán inesquecible".