O colexio da Florida, en Sanxenxo, rendeu este venres unha homenaxe á súa alumna Ainhoa Hernández Pazmiño, de 6º de Primaria, gañadora do premio nacional ¡Ahora vamos andando al cole! organizado por Stop Accidentes e Fundación Mapfre.
O seu debuxo e mensaxe, titulado "As consecuencias da irresponsabilidade", foi un traballo destacado polo xurado pola súa mensaxe "clara e orixinal".
Resultou elixido entre un total de 20.608 alumnos e alumnas de toda España.
A obra gañadora divídese en tres secuencias diferentes baixo os títulos 'O paraíso esperado', 'O xardín dos horrores' e 'O inferno das consecuencias'.
Segundo explicou a alumna, cada viñeta leva aos distintos momentos polos que pode pasar unha persoa "que comete unha imprudencia en seguridade viaria".
O premio nacional inclúe dous recoñecementos compartidos, un cheque de 2.000 euros para unha excursión ou viaxe para a clase da alumna premiada e un cheque de 750 euros para que o colexio adquira material ou equipamento.
Ao estar a piques de terminar as clases e non dar tempo a organizar unha actividade, a dirección acordou regalar a Ainhoa un ordenador portátil para a súa nova etapa educativa na ESO.
Ao acto asistiron os concelleiros de Educación e de Seguridade Cidadá, Nati Parada e Xoán Pérez; representantes de Stop Accidentes e Fundación Mapfre, o xefe da Policía Local, José Manuel Duarte; o policía Abelardo Martínez, "Poli Paco", e familiares da galardoada.