A asociación ecoloxista Vaipolorío presentou unha denuncia formal ante o 112 e ante Augas de Galicia por unha vertedura directa de augas fecais ao río Gafos, ao seu paso pola cidade de Pontevedra.
Segundo trasladou o colectivo, o punto de vertedura localízase nas inmediacións da estación de autobuses, na marxe dereita da canle.
En concreto, denuncian a existencia dun colector de fecais situado a uns 25 metros río abaixo da Ponte do Couto, que estaría a descargar augas residuais sen ningún tipo de filtrado.
Vaipolorío asegura que esta vertedura non é un feito puntual, senón que vén producindo desde hai tempo de forma continuada, o que, ao seu xuízo, supón un grave impacto ambiental para o ecosistema fluvial do Gafos, un río especialmente sensible polo seu valor natural e a súa recuperación nos últimos anos.
A asociación puxo os feitos en coñecemento dos servizos de emerxencia do 112 e do organismo autonómico competente en materia hidráulica, co obxectivo de que se investigue a orixe da vertedura, se adopten medidas urxentes para o seu cesamento e, no seu caso, se depuren responsabilidades.
Desde o colectivo ecoloxista reclaman unha actuación inmediata por parte das administracións para evitar que continúe a deterioración do río, así como unha revisión do estado da rede de saneamento na zona para previr novos episodios similares.