Até Pontevedra desprazouse este luns o presidente do PP de Galicia e da Xunta, Alfonso Rueda.
Fíxoo para participar no proceso de votación para elixir o presidente do Partido Popular a nivel nacional.
O máximo responsable popular a nivel galego asegurou que "non tiña ningunha dúbida" do voto por Alberto Núñez Feijóo para o congreso nacional que os populares celebrarán en xullo.
"É o cambio que necesita España", afirma Rueda facendo referencia á crise que atravesa o Goberno presidido polo socialista Pedro Sánchez e que defende está "cada vez máis acorralado e sen saída".
No que respecta a ese momento nacional, coa caída primeiro de José Luís Ábalos e agora do número 3 do PSOE Santos Cedrán, "é a corrupción do partido estendida ao goberno", acusou Alfonso Rueda.
"Así é imposible gobernar e podo asegurar, como responsable dunha comunidade autónoma, que esto o notamos no día a día. Estar así moitos meses máis é insostible e a Galicia non lle conviría en absoluto", sinalou o presidente do PPdeG ante os medios de comunicación presentes na sede provincial dos populares en Pontevedra.
Rueda foi incluso máis aló ao asegurar que "isto claro que vai a influír nas eleccións municipais", xa que "estamos vendo como saen alcaldes tamén aquí, dirixentes socialistas que están dicindo o que pensan".
Ademais Alfonso Rueda lanzou unha mensaxe ao Bloque Nacionalista Galego preguntando cal será a súa posición. "Vai ir á rolda de consultar con Sánchez para recabar apoios? Só o feito de asistir é un referendo. Se o siguen apoiando será cómplice", sinalou o presidente autonómico.
