As aulas e talleres da Escola Superior de Conservación e Restauración de Bens Culturais de Galicia, en Pontevedra, convertéronse estes meses nun auténtico laboratorio de recuperación da memoria. Alí, o alumnado de cuarto curso da especialidade de pintura traballa con mimo e rigor na restauración das táboas policromadas de Dimas e Xestas, dúas pezas singulares do antigo Calvario da Semana Santa de Cangas do Morrazo.
O avance dos traballos puido comprobarse de primeira man durante a visita de membros da xunta directiva da Confraría da Misericordia – Gremio de Mareantes de Cangas, que se achegaron ao centro pontevedrés para coñecer o proceso de recuperación destas valiosas obras. A comitiva foi recibida polo equipo directivo e docente da escola, encabezado polo vicedirector Antón Pereira Abonjo, a xefa de estudos Susana Ara Poceiro e a directora Andrea Fernández Arcos, todos eles especialistas en conservación e restauración.
Pero o verdadeiro protagonismo recaeu no alumnado: Verónica Samaniego, Inés Pampín, Ana Piñeiro, Pablo Lamothe, Cristina Viñas e Martina Yanci foron os encargados de explicar, paso a paso, as técnicas empregadas na intervención.
Trátase dun traballo exhaustivo que comezou cun estudo preliminar das pezas —analizando materiais, técnicas de execución e estado de conservación— e que xa permitiu actuar sobre o soporte e a estrutura pictórica.
Tratamentos biocidas, consolidación, fixación da pintura, limpeza superficial ou retirada parcial de repintes pouco respectuosos forman parte dun proceso que combina coñecemento científico, destreza manual e respecto absoluto polo ben patrimonial.
Aínda quedan fases por completar, como a reintegración cromática, o vernizado ou a reconstrución dalgúns elementos, sempre baixo estritos criterios técnicos e coas autorizacións do Arcebispado de Santiago e da Dirección Xeral de Patrimonio Cultural.
Máis aló da aprendizaxe académica, o proxecto pon en valor a implicación do alumnado pontevedrés na conservación dun patrimonio único. Trátase de pezas de arte efémera, creadas para momentos litúrxicos moi concretos, pero que hoxe son un valioso testemuño histórico e cultural. A súa singularidade é aínda maior si tense en conta que o antigo Calvario de Cangas combinaba imaxes de vulto redondo con táboas policromadas dos ladróns, unha disposición pouco habitual en Galicia.
Grazas ao traballo destes estudantes, Dimas e Xestas non só recuperan o seu aspecto orixinal, senón que tamén reforzan o vínculo entre formación, patrimonio e sociedade, demostrando que desde Pontevedra se contribúe activamente a preservar a riqueza cultural de Galicia.