Desde que no ano 2023 quedara gravemente fragmentado tras un accidente, os restos do Cruceiro do Montiño estaban custodiados en instalacións municipais agardando o seu arranxo.
Pero, a partir de agora, este ben patrimonial queda nas mans da Escola Superior de Conservación e Restauración de Bens Culturais de Galicia. Será o seu alumnado o que se encargue de devolverlle todo o seu esplendor.
A redacción do proxecto e a dirección técnica corren a cargo do profesor e restaurador José Manuel Rey Aguiño, especialista en bens escultóricos.
Os traballos serán executados polo alumnado da escola dentro da materia de "Prácticas de conservación activa", o que engade un valor formativo á recuperación patrimonial.
Os restos deste cruceiro de Lérez, tamén coñecido como de Casal Novo, foron trasladados esta semana ás dependencias da escola pontevedresa para dar comezo aos traballos de restauración.
O cruceiro, de estilo barroco e datado en 1737, sufriu graves danos tras ser derrubado por un vehículo, o que provocou a fractura do varal, o capitel e a cruz en múltiples fragmentos.
O plan de traballo estrutúrase en dúas fases, a primeira delas na propia escola.
Estará centrada na limpeza, na eliminación de elementos metálicos oxidados (como antigas cuñas de ferro) e na unión estrutural dos fragmentos do varal, capitel e cruz mediante variñas de fibra de vidro ou aceiro inoxidable.
A restauración da plataforma e do pedestal do cruceiro, pola súa banda, farase no propio lugar de Casal Novo, onde tamén se realizará a montaxe final do conxunto.
O informe técnico advirte que o emprazamento orixinal, nun cruzamento estreito de apenas 2,80 metros, supón un risco para o ben e para a seguridade viaria, ademais de presentar problemas co cableado aéreo que incumpre as alturas regulamentarias.
Por este motivo, o proxecto propón un lixeiro cambio de emprazamento dentro da mesma contorna de protección, que será atendido polas autoridades municipais.
Esta medida busca garantir a seguridade do cruceiro fronte ao tráfico rodado e mellorar a súa visibilidade sen que iso teña a consideración administrativa de traslado, ao manterse no seu contexto histórico.
O concelleiro da área de patrimonio histórico, Alberto Oubiña, asegurou que o goberno municipal está "encantado" de colaborar coa Escola de Restauración porque "son uns grandísimos referentes en todo o que fan e na calidade do alumnado que forman".
"Confiamos plenamente no seu criterio e, de seguro, esta será a primeira de moitas colaboracións", sinalou o responsable municipal.
Engade Pontevedra Viva como fonte preferida de Google de balde
Mantente informado coas últimas noticias de actualidade.