'Polo dereito das mulleres a decidir: aborto libre e gratuito'. ÿ o que se pode ler na pancarta que, desde este venres, está colgada no balcón da vella Casa Consistorial da Praza de España. ÿ un dos primeiros actos organizados polo Concello de Pontevedra para implicar aos pontevedreses na campaña contra a polémica reforma da lei do aborto, impulsada polo ministro de Xustiza, Alberto Ruíz Gallardón.
"Cremos que temos que dar un golpe potente na mesa e deter este retroceso como sexa", sinalou a concelleira de Benestar Social, Carmen Fouces. Asegura que a reforma lexislativa equipara a España con países extremistas como Irán. "Esa é a inspiración de Gallardón para esta norma legal", dixo. "Pasamos de ter unha lei sanitaria a unha lei do Código Penal. Ese é o gran salto do PP na interrupción voluntaria do embarazo".
Fouces lamentou que se modifique a lei do aborto cando "non había ningún debate social, máis alá da dereita máis extrema da igrexa católica", apostando por unha normativa que, entende, determina que "o ámbito das mulleres é menor e hai que telo controlado pola igrexa, os xuíces e o staff médico máis reaccionario". E todo dunha forma "case unilateral e arbitraria".
En todo caso, desde o goberno municipal aseguran que a cidadanía "ten o poder suficiente para darlle a volta a isto" e instan a non fiarse das voces discordantes dentro do PP con esta lei. Trátase, segundo Fouces, dunha "estratexia planeada", ao haber grupos dentro do partido "que predican para a parte máis retrógada" e outras figuras como Núñez Feijóo, "polis buenos que predican cara a parroquia que non entende tan ben esta reforma".
Pero Fouces concluíu asegurando que "non nos enganan" porque esta lei é "absolutamente coherente con todo o que o PP está facendo estes anos" en materia de recortes laborais, sanitarios ou sociais "e agora co recorte dos dereitos das mulleres a decidir".