O novo parque infantil de Ánkar foi inaugurado este venres convertido xa nun espazo chamado a ser punto de encontro para familias de Poio.
Había gran expectación na parroquia de San Salvador ante a estrea dunha área de xogos totalmente renovada, cun deseño moi especial inspirado na figura de Cristóbal Colón.
Dende primeira hora, numerosos nenos correron a descubrir os novos xogos, mentres as familias desfrutaban dunha xornada festiva con inchables, chocolate quente e animación a cargo de Javi Solla, que se meteu na pel do propio Colón para guiar a aventura.
No acto de inauguración participaron o presidente da Deputación de Pontevedra, Luis López, o alcalde de Poio, Ángel Moldes, membros do goberno local, representantes de colectivos e moita veciñanza.
Os verdadeiros protagonistas finalmente foron os máis pequenos, que estrearon cada recuncho do parque cun sorriso.
A actuación contou cun investimento de 161.639 euros, financiados a través do Plan +Provincia da Deputación de Pontevedra, e permitiu unha renovación integral da área infantil.
O resultado é un parque temático de inspiración coloniana, en coherencia coa proximidade da Casa Museo de Cristóbal Colón e coa vinculación histórica do navegante co municipio.
A gran estrela do novo espazo é unha réplica da Santa María, o barco no que Colón realizou a súa primeira viaxe a América.
A embarcación inclúe zonas de xogo a distintas alturas con tobogáns, paneis trepadores, espazos de escalada, hamaca cama, timón, telescopio, mapa do tesouro ou crebacabezas, fomentando o xogo creativo, a aventura e a imaxinación.
A área de xogo ocupa arredor de 300 metros cadrados e complétase cunha segunda embarcación máis pequena, pensada especialmente para nenos menores de seis anos.
Ademais, incorpora columpios para bebés e inclusivos, xogos xiratorios con temática mariña e outros elementos que reforzan o carácter lúdico e educativo do parque. A ampliación da capacidade, a mellora da accesibilidade e a inclusión foron tamén prioridades no deseño.
Durante a inauguración, o alcalde Ángel Moldes destacou que "Poio é un concello mozo, con preto de 3.000 rapaces menores de 14 anos, unha realidade que nos impulsa a desenvolver políticas centradas nas familias".
Nese sentido, lembrou iniciativas como a baixada de impostos, a posta en marcha da unidade de atención temperá, a mellora dos servizos de conciliación e unha programación cultural, lúdica e deportiva "moi potente durante todo o ano".
Moldes asegurou tamén que o goberno local está a cumprir co seu programa, que incluía a construción e renovación de parques infantís para facelos "máis atractivos, seguros e inclusivos".
Avanzou que existe un plan de actuación en todas as parroquias, como Chancelas, Vilariño, Ánkar, Samieira ou A Seca, ademais de labores de mantemento nos parques xa existentes.
Pola súa banda, o presidente da Deputación, Luis López, salientou que se trata dunha obra que "reforza o vínculo coa tradición mariñeira, mellora a imaxe do barrio e ofrece alternativas de lecer seguras e modernas".
Ademais, puxo en valor o traballo do goberno local para captar investimentos doutras administracións e destacou que, neste mandato, a Deputación leva investidos en Poio un total de 3,5 millóns de euros.