O persoal de limpeza do Hospital do Salnés decidiu aprazar o inicio da folga indefinida ata o mércores 21 de xaneiro, tras unha decisión adoptada en asemblea para reclamar a equiparación das súas condicións laborais coas doutros centros hospitalarios de referencia.
A folga estaba previsto inicialmente que comezase este mércores 7 de xaneiro.
Os traballadores denuncian que, malia realizar as mesmas tarefas e responsabilidades, non lles recoñecen os mesmos dereitos que ao persoal da limpeza doutros hospitais, aplicándolles un convenio provincial que supón condicións inferiores en materia de salario, complementos, permisos e xornada.
A central sindical CIG, que coordina a protesta, subliña que esta situación representa un agravio evidente e que resulta especialmente grave que sexa unha administración pública quen perpetúe a discriminación e a precariedade laboral.
Ademais das mobilizacións, a CIG impulsa mocións nos concellos das áreas sanitarias afectadas e mantén conversas cos grupos parlamentarios para reclamar iniciativas que permitan avanzar na equiparación do persoal.
O xoves 22 de xaneiro está prevista unha concentración diante do SERGAS en Santiago, mentres o colectivo confirma que continuará coas accións reivindicativas ata conseguir unha mesa de negociación real co departamento autonómico.
A folga tamén afecta os servizos de limpeza dos hospitais do Barbanza e Virxe da Xunqueira de Cee.