O persoal dos servizos de limpeza do Hospital do Salnés, en Vilagarcía de Arousa, está a desenvolver unha loita conxunta xunto a traballadores dos hospitais do Barbanza (Ribeira) e Virxe da Xunqueira (Cee).
É para demandar a equiparación das súas condicións salariais e laborais coas do persoal dos hospitais de referencia da área sanitaria.
As traballadoras e traballadores de Vilagarcía levan dous días realizando paros de dúas horas por quenda nas xornadas de folga, que teñen un seguimento total a pesar dos servizos mínimos considerados abusivos, desde a CIG-Servizos.
No Salnés, celebrouse tamén este mércores unha concentración diante do hospital, á que se sumaron representantes doutros departamentos como o persoal sanitario, de mantemento e de cociña, para amosar a súa solidariedade.
A folga parcial e as protestas repetiranse nos días 18, 19, 25 e 26 de novembro, e continuarán en decembro os días 3, 9, 10, 16, 17, 22, 23, 29 e 30.
O colectivo denuncia que, ao estar externalizados os servizos de limpeza, o persoal réxese polo convenio provincial, o que implica condicións máis precarias respecto ao salario, permisos, descansos ou xornada laboral, con respecto ao persoal propio do Sergas.
A CIG-Servizos lembra que este desequilibrio xa foi solucionado nos hospitais de Burela e O Barco, pero segue sen resolverse nos centros do Salnés, Barbanza e Cee.
A central sindical critica a falta de resposta por parte da Consellería de Sanidade, tras meses de solicitudes de diálogo, e mantén a permanencia das protestas do persoal ata poñer fin á discriminación que denuncian.