O Centro Asociado da Universidade Nacional de Educación a Distancia (UNED) en Pontevedra, mantén aberto o prazo de matrícula para o curso "Experto en conceptos crave para a valoración financeira e a xestión empresarial", que se celebrará os días 6 e 7 de novembro de 2025.
Esta formación será impartida por Montserrat Hernández Solís, doutora e profesora do Departamento de Economía da Empresa e Contabilidade da UNED, baixo a coordinación de Rafael Cotelo Pazos, responsable do Departamento de Extensión Universitaria e Actividades Culturais de UNED Pontevedra.
Este curso está pensado para persoas que queiran adquirir unha base sólida en valoración financeira e xestión económica.
Non se esixen coñecementos previos na materia, aínda que se recomenda ter un manexo básico de follas de cálculo.
Ao longo das sesións, o alumnado introducirase nos fundamentos da matemática financeira, unha ferramenta esencial para comprender o valor do diñeiro no tempo, os investimentos, os préstamos ou a xestión eficiente de recursos empresariais. Cun enfoque práctico e accesible, o curso combina teoría e aplicación real, ensinando a utilizar as principais funcións financeiras de Microsoft Excel (VF, VAI, PAGO, TASA, NPER, entre outras), imprescindibles para a toma de decisións no ámbito do investimento e o financiamento.
A formación desenvolverase en modalidade híbrida, podendo seguirse de forma presencial no Centro Asociado da UNED en Pontevedra, ou en streaming, tanto en directo como en diferido, facilitando así a participación desde calquera lugar.
O horario será de 16:00 a 21:00 horas, sumando un total de 10 horas lectivas e con recoñecemento de 0,5 créditos ECTS. A matrícula ten un custo único de 25 euros, independentemente da modalidade elixida.
Para obter o certificado de aproveitamento, será necesario asistir ao 85 % das horas lectivas. No caso dos estudantes online, requirirase ademais a entrega dun breve traballo final na semana posterior á última sesión.