Un do tres mozos de orixe magrebí que foron apuñalados durante a liorta rexistrada este martes na Praza de Barcelos segue en estado grave e está a ser atendido das feridas que sufriu por todo o seu corpo.
Outra das vítimas, que do mesmo xeito que el está ingresada no Hospital Montecelo de Pontevedra, ten feridas leves, mentres que o terceiro apuñalado, cuxo estado é reservado, foi trasladado ao hospital de Santiago de Compostela.
Tanto as tres vítimas como o catro detidos por esta agresión terían entre 20 e 25 anos, segundo confirman fontes da investigación.
Os arrestados, todos eles de nacionalidade colombiana, atópanse nos calabozos da Policía Nacional en Pontevedra, á espera de pasar a disposición xudicial.
O Tribunal Superior de Xustiza de Galicia (TSXG) explicou que o traslado a dependencias xudiciais non se producirá até "mañá ou pasado".
Ademais dos catro detidos, que foron localizados tras a agresión na Rúa Aduana, en posesión dun coitelo que aínda tiña restos de sangue, os investigadores teñen identificada a unha quinta persoa, á que confían deter nas próximas horas.
A pelexa produciuse sobre as seis da tarde na Praza de Barcelos, en pleno centro da cidade de Pontevedra, á beira do parque infantil e das pistas de baloncesto.
Foi unha testemuña a que alertou ás autoridades ao presenciar a pelexa e advertir que, polo menos dous dos mozos foran feridos cun coitelo.
Todos os implicados nesta liorta protagonizaron "hai un tempo" un amago de pelexa, informaron fontes policiais, pero acabaron fuxindo antes de que chegara a policía.