Arcade terá por fin a súa nova depuradora

Un acordo dos concellos de Soutomaior, Vilaboa e Pontevedra con Augas de Galicia permitirá desbloquear por fin a nova depuradora de Arcade.

Esta nova infraestrutura, que custará preto de 17 millóns de euros, é considerada "estratéxica" polo tres municipios para garantir o saneamento do fondo da ría de Vigo e da enseada de San Simón.

Así o defenderon este martes os alcaldes de Soutomaior e Vilaboa, Manu Lourenzo e César Poza, respectivamente, e a alcaldesa accidental de Pontevedra, Eva Vilaverde.

O tres concellos teñen xa os convenios asinados, quedando unicamente pendentes os últimos trámites administrativos para formalizar definitivamente o acordo.

Desde o porto de Arcade, Lourenzo destacou que este acordo permite desbloquear un proxecto histórico que levaba anos sen avances e que resulta "fundamental" tanto para a protección ambiental como para o desenvolvemento económico da contorna.

"Atopámonos cun proxecto que levaba anos sen executarse e sen os deberes feitos", indicou o rexedor, que agradeceu a disposición de todos os implicados para desatascar unha actuación "imprescindible para o futuro da nosa ría".

O rexedor explicou que a actual depuradora conta cun sistema "completamente obsoleto" e sen tratamento secundario, o que provoca vertidos nun espazo de alto valor ambiental como é a enseada de San Simón, integrada na Rede Natura.

A nova infraestrutura incorporará a mellor tecnoloxía dispoñible, incluíndo un tanque de tormentas que evitará os alivios directos á ría durante episodios de fortes choivas, mellorando de forma substancial a calidade das augas.

Ademais, a construción da nova EDAR permitirá liberar o espazo que ocupa a instalación actual, favorecendo a recuperación dun enclave privilexiado da fachada marítima de Arcade e reducindo o impacto paisaxístico desta infraestrutura.

No caso de Soutomaior, o Concello asumirá unha achega de preto de 1,7 millóns de euros, ademais da adquisición dos terreos necesarios para a construción da EDAR.

Os responsables de Pontevedra e Vilaboa, pola súa banda, lembraron que este proxecto mellorará a calidade de vida dos veciños, contribuirá á recuperación ambiental da ría e reforzará a actividade económica vinculada ao mar, especialmente a pesca e o marisqueo.

"Para Vilaboa, a importancia desta EDAR está no que supón para o fondo da ría e para o seu saneamento", sostivo César Poza, especialmente debido á "situación crítica" que atravesan as familias das confrarías de Arcade e de Pedro Oliveira.

Poza explicou que Vilaboa asume esta actuación por "compromiso ambiental", a pesar de que o concello se atopa cun escenario inesperado que obriga a asumir unha achega económica moi elevada, ao redor de medio millón de euros.

Indicou que o seu goberno o asumirá "porque a ría o necesita e porque non podemos permitirnos perder máis tempo", aínda que reiterou que todas as administracións deben implicarse para sacar este proxecto adiante.

Así, todos reclamaron a incorporación da Deputación de Pontevedra ao financiamento desta actuación, maioritariamente sufragada con fondos europeos, ao tratarse dunha infraestrutura de carácter supramunicipal e estratéxica para toda a provincia.

Segundo as previsións actuais, a nova depuradora poderá estar rematada ao longo do período de execución previsto no plan hidrolóxico, ao redor do ano 2029.