Este venres tivo lugar no Hospital Montecelo o acto de benvida aos 63 novos residentes que inician a súa formación nos centros sanitarios de Pontevedra e o Salnés.
O xerente da Área Sanitaria, José Flores, destacou a importancia destas novas incorporacións ao equipo sanitario pontevedrés, agardando que se sintan "benvidos, cómodos e plenamente integrados no equipo".
Así mesmo, expresou a súa confianza en que esta nova etapa sexa "moi positiva para todos", reafirmando o compromiso do Servizo Galego de Saúde coa formación, a incorporación de novos talentos e a mellora continua da calidade de asistencia.
Dos 63 residentes que se formarán na Área Sanitaria de Pontevedra e O Salnés, 23 pertencen á categoría de Medicina familiar e comunitaria, 8 enfermeiras de familia, 1 enfermeira de saúde mental, 1 enfermeira de pediatría, 2 matronas, 2 farmacéuticas e 1 químico.
Así mesmo, realizarán a súa residencia 25 profesionais que se especializarán nos diferentes campos da medicina. Deste xeito, queda cuberto o 100 % das prazas.
O acto contou tamén coa presenza da presidenta da Comisión de Docencia de Medicina Familiar e Comunitaria, Yolanda Fernández; do presidente da Comisión de Docencia de Atención Hospitalaria, Luis Anibarro; da presidenta da Subcomisión de Docencia de Enfermería Familiar e Comunitaria, Teresa Villanueva; e da presidenta da Subcomisión de Docencia de Enfermería Hospitalaria, Cristina Sanmartín.