Clotilde, Jorge, Sara, Manolo, 'Cholo', María Dolores, Miguel, Hortensia, Cristina, Lorena... Son só un puñado de nomes dos centos de afortunados que deixou a lotería de Nadal este 22 de decembro en Sanxenxo. Todos teñen en común o número 89023, do que se venderon 960 décimos na localidade turística, e que este martes, tras coñecerse a feliz noticia, coincidiron no bar California para celebrar a sorte do quinto premio con champaña, sidra, abrazos, felicitacións e mesmo gorros de festa e confetti. Eles poñen cara e nome ao día no que se concentrou máis alegría por metro cadrado na 'Marbella galega'.