Nas últimas horas só se rexistraban dous falecementos en Galicia, os dous producíanse na área sanitaria de Pontevedra e O Salnés, segundo notificaba a Consellería de Sanidade.
Trátase dunha muller de 87 anos e dun home de 97 anos. Os dous perdían a vída no Hospital Montecelo e ambos contaban cun historial clínico no que figuraban outras enfermidades previas, segundo os datos facilitados polo Servizo Galego de Saúde.
Con estes dous novos falecementos, a cifra de persoas que perderon a vida na área sanitaria de Pontevedra e O Salnés ascende a 75 pacientes desde o inicio da pandemia. A última morte rexistrouse este venres tamén en Montecelo, unha muller de 70 anos, que presentaba patoloxías previas.
En Galicia con estas novas mortes, o número de persoas que perderon a vida desde que comezaron a tomarse rexistros desta enfermidade é de 1.338 persoas.
ROSA QUINTANA, TAMÉN POSITIVO EN COVID-19
Nas últimas horas, tamén facía público o seu positivo en coronavirus a conselleira do Mar, Rosa Quintana sinalando que se atopa ben e asintomática. Segue os protocolos de Saúde Pública e os contactos foron avisados e supervisados.
Permanecerá confinada ata que se recupere totalmente. Indica tamén nun twitter que se manterá pendente do sector marítimo pero nesta ocasión a través de "vía telemática".