Os viños Rías Baixas seguen aumentando a súa presenza nos mercados internacionais. Tanto que, actualmente, o 28% de todo o viño que se produce nesta denominación de orixe véndese fóra das nosas fronteiras.
Así o recolle o Consello Regulador no balance do exercicio de 2015, ano no que as exportacións creceron un 7,6% ata alcanzar as 7.728.544 botellas, que alcanzaron un valor no mercado de case 30 millóns de euros.
Un total de 97 adegas, das 183 adscritas á Denominación, comercializaron os seus viños nalgún dos seis mercados onde Rías Baixas activou plans de exportación -Estados Unidos, Reino Unido, México, Irlanda, Benelux e Xapón- ou nalgún outro onde se organizan accións de promoción puntuais como Suíza, China ou Canadá.
Os dez principais mercados de exportación na Denominación de Orixe Rías Baixas son Estados Unidos -onde as vendas superaron os 11 millóns euros-, Reino Unido, Alemaña, Porto Rico, México, Holanda, Xapón, Irlanda, Suíza e Suecia. Chaman a atención os crecementos experimentados por Xapón (74,78%), Porto Rico (41,6%), Reino Unido (34,81%) e Alemaña (14,31%), entre outros.
"Aínda que en Estados Unidos estamos ben situados, aos poucos vanse equilibrando as cifras de vendas dos viños de Rías Baixas entre Europa e América. Por iso, nos últimos anos intensificamos os nosos plans específicos en diferentes países e xa estamos a recoller os seus froitos", sinalou o presidente do Consello Regulador, Juan Gil de Araújo.
Con estes datos, a denominación Rías Baixas consolídase como a cuarta denominación de orixe española en canto a volume de viño branco embotellado exportado.