As tres profesionais que traballan na praza de abastos de Vilaxoán desprazaranse de maneira temporal á antiga panadería, situada moi preto do Mercado.
Desta forma descártase a idea inicial de establecer os tres postos en casetas situadas no exterior.
O goberno local de Vilagarcía mantivo un encontro coas afectadas para explicarlles o cambio de decisión e pedir desculpas polos erros de comunicación sobre as decisións adoptadas, segundo recoñecen desde Ravella.
As obras do Mercado supoñerán un investimento de máis de 210.000 euros e o atraso durante uns días do inicio das obras, segundo o goberno local, non afectará ao investimento nin aos prazos de execución.
A actuación, que busca dinamizar o mercado atraendo novos vendedores, clientes e actividades, tiña un prazo inicial de execución de catro meses.