Ata 4.000 euros repartiu o Concello de Sanxenxo entre os gañadores da terceira edición do concurso Deslumbra co teu Nadal.
O seu obxectivo era facer partícipe á veciñanza e ao sector do comercio local da ambientación do municipio e xerar unha contorna embelecida que reforzase a decoración municipal.
Todo iso apelando á creatividade dos veciños e veciñas de Sanxenxo.
Na categoría de establecementos comerciais, que debían decorar fachada e escaparate, o primeiro premio, dotado con 1.000 euros, foi para Muebles Dopazo.
O segundo premio, con 750 euros, foi para Restaurante Xerfa; e o terceiro, con 500 euros, foi para Mahonia Interiorismo.
Na decoración exterior de vivendas, o gañador foi Sergio Santiago Carballo, que recibiu un premio de 500 euros.
Xunto a el, foron recoñecidos Mari Carmen Lemetre Fariña e María Belén Freijeiro Otero, autoras do segundo e terceiro premio, que gañaron 300 e 200 euros respectivamente.
O premio único para a decoración da contorna de rúas, barrios, prazas ou veciñanzas, dotado con 750 euros, foi para os veciños da Rúa Eira.
"É unha iniciativa para incentivar a participación no Nadal e premiar aquelas decoracións que sexan máis orixinais. Cada ano, sopréndennos e agradecemos a implicación dos participantes", sinalou a concelleira de cultura, Elena Torres.
Para elixir aos gañadores, o xurado valorou a iluminación, a orixinalidade e o deseño, o fomento de valores locais, o contido didáctico do proxecto e o coidado do medio ambiente con utilización de materiais ecolóxicos.
