Os trens Avril, que permitirán circular a alta velocidade entre as principais cidades galegas, comezarán a operar o vindeiro luns 21 de maio. Para esta estrea, Renfe está a afinar o seu funcionamento para que nada falle o día da ansiada estrea.
Fíxoo este xoves cunha viaxe de simulación comercial destes novos trens S106, deseñado para medir, practicar e comprobar todas as fases de explotación. A el, desde Madrid, subiu o ministro de Transportes e Movilidad Sostible, Óscar Puente.
Este tren partiu ás sete e media da mañá da estación madrileña de Chamartín e chegou dúas horas despois, pasadas as nove e media, a Ourense.
Despois doutros 35 minutos fixo parada en Santiago, onde subiu o presidente da Xunta, Alfonso Rueda, entre outras autoridades, para poñer rumbo ata A Coruña, onde o ministro deu máis detalles destes novos trens.
Puente asegurou que Galicia contará "con más plazas" para a súa conexión con Madrid e que tamén gañará "algunas frecuencias", polo que reiterou que "hoy es un día grande" para a comunidade galega ao reducirse significativamente os tempos de traxecto.
"No hay ningún tren en el mundo que pueda llegar a los 300 kilómetros por hora por diferentes anchos y diferentes tensiones, lo cual habla muy bien de la tecnología Talgo y de la tecnología que vamos a implantar en esta zona", destacou o titular de Transportes.
Os novos trens permitirán multiplicar por máis de dous as prazas dispoñibles entre Madrid e Galicia e, segundo dixo o ministro, non supoñerán unha redución de frecuencias, senón que mesmo "se ganará alguna más". A oferta, dixo, "se irá adaptando a la demanda".
Isto estará ademais supeditado ás obras na estación de Chamartín, que se prevén terminar en xullo, data na que "mejoraremos horarios y frecuencias".
Así, coa chegada dos novos trens, ata o 21 de xullo, poñeranse en servizo catro servizos co tren S106 (modelo Avril), ida e volta, a Vigo e A Coruña. Ata principios de outubro, serán oito servizos con Avril, dúas idas e dúas voltas a Vigo e A Coruña.
E desde principios de outubro, todos os servizos serán con trens Avril, salvo Lugo-Madrid e Ourense-Alacante, subindo a 24, cun servizo Avlo -o tren AVE de baixo custo de Renfe- por sentido a Vigo e A Coruña.
Os trens da serie 106 son vehículos máis lixeiros e aerodinámicos. Son tamén máis anchos, o que lles permite albergar máis de 500 pasaxeiros (ata 507 nos AVE) e completamente accesibles, cun só piso e á altura da plataforma. Alcanzan os 330 km/h.
A distribución dos seus doce coches realízase entre coches con butacas en disposición de 2+2 e 3+2. Ademais, dispoñen de paneis de información en sala, wifi, espazos para carriños de bebé e máquinas vending, segundo subliña a operadora ferroviaria.