Un total de 31.175 galegos. Son os que, segundo os datos do Ministerio de Sanidade, recibiron as dúas doses da vacina contra a covid-19.
Entre eles atópanse, principalmente, os usuarios de residencias da terceira idade, os traballadores destes centros ou o persoal sanitario que está en primeira liña de atención aos pacientes con coronavirus.
A este respecto, persoal da área sanitaria de Pontevedra e O Salnés empezou a recibir esta segunda dose de inmunización este mércores, pasados os 21 días establecidos entre cada unha das doses.
Fixérono, entre outros puntos, no Complexo Hospitalario de Pontevedra ou no centro de saúde Virxe Peregrina, segundo confirmaron desde o Servizo Galego de Saúde.
A pesar de solicitar esa información, desde a xerencia da área sanitaria de Pontevedra e O Salnés non desvelaron cantos traballadores recibiron a vacina, tanto os que se inxectaron a primeira das doses como os que xa teñen as dúas.
O seguinte grupo en recibir a vacina contra a covid-19, segundo os plans de Sanidade, son os maiores de 80 anos.
Galicia administrou ata o momento o 79,9% das vacinas recibidas, unha media similar á taxa española. En concreto, inxectáronse 90.643 dose das 113.425 que chegaron.