As PCR sen cita que se estiveron facendo no Hospital de Provincial de Pontevedra permitiron detectar a 812 persoas contaxiadas de covid-19 na última semana.
Así se recolle no balance que fixo o Servizo Galego de Saúde dos últimos sete días de probas, entre os días 23 e 29 de decembro.
En total, os sanitarios realizaron nese período un total de 6.926 probas, polo que a taxa de positividade alcanzou un 11,72%.
A estes positivos súmanse ademais os outros 1.136 contaxios que se lograron identificar nas probas, xa con cita desde o Sergas, nos puntos PCR Auto do Provincial ou Montecelo.
Durante a última semana, foron 2.481 as probas realizadas nestes puntos, onde acoden persoas con síntomas ou contactos estreitos, polo que a positividade disparouse ata o 45,78% do total de pacientes testados.
O Sergas detallou ademais os positivos que xurdiron, neste caso mediante antíxenos con saliva, na estación de tren de Pontevedra, nas probas voluntarias ao dispor de todos os viaxeiros que chegaron á terminal.
En concreto, neste cribado afloraron outros 43 positivos, mentres que outras 958 persoas deron negativo tras someterse a estas probas de antíxenos.