A Escola de Educación Infantil (EEI) Concepción Crespo Rivas, en Pontevedra, segue a vivir un inverno marcado polo frío intenso no interior das súas aulas.
Segundo denunciou o sindicato CIG-Ensino, preto de 200 nenos e nenas de 3, 4 e 5 anos, xunto ao persoal docente, levan desde o inicio do curso escolar, o pasado mes de setembro, sen servizo de calefacción.
Esta situación deriva, segundo a organización sindical, dunha "actuación neglixente" da Consellaría de Educación nunhas obras de reforma que foron publicitadas como rematadas sen contar coas garantías legais necesarias.
O foco do problema reside na nova instalación de gas, que non logrou superar as inspeccións pertinentes.
O sindicato revela que o inspector técnico encargado de autorizar o subministro visitou o centro en varias ocasións, detectando deficiencias de gravidade que impiden a posta en funcionamento do sistema.
Para a CIG-Ensino, isto confirma que a Xunta permitiu o uso das novas dependencias sen o correspondente certificado de fin de obra nin as condicións mínimas de habitabilidade.
A consecuencia directa é que o alumnado recibe docencia con temperaturas que, en moitas ocasións, caen por debaixo dos 14 graos. Esta cifra incumpre a normativa básica de seguridade e saúde no traballo, un feito que o sindicato cualifica de "flagrante" e "imperdoábel" dada a curta idade dos afectados.
Ante a falta dunha solución definitiva, a Consellaría de Educación autorizou o uso de calefactores eléctricos como medida de urxencia.
Este remedio, segundo o sindicato, resultou ser un novo problema, xa que a rede eléctrica do centro non está dimensionada para soportar tal demanda de enerxía, o que provoca apagóns constantes, con varios ao día, por sobrecarga.
Desde o sindicato advirten que esta situación non só é ineficaz para quecer as aulas, senón que supón un risco engadido para a seguridade dos menores e do persoal, seguindo as advertencias dos propios técnicos.
O secretario comarcal da CIG-Ensino en Pontevedra, Xacobe Rodríguez, considera unha "grave deixación de funcións" por parte da Administración.
“Resulta absolutamente inadmisíbel que se presuma de calidade e melloras nas infraestruturas mentres se mantén unha escola infantil sen calefacción desde hai meses”, sinalou o voceiro.
Ante a falta de respostas eficaces por parte da Xefatura Territorial, o sindicato xa trasladou o caso á Mesa Sectorial de Educación e presentou unha denuncia formal ante a Inspección de Traballo.
A comunidade educativa e a ANPA do centro, que levan meses mobilizándose mediante escritos e protestas, esixen que se execute de inmediato unha solución técnica que garanta o dereito a unha educación en condicións dignas e seguras.