Até o próximo 30 de setembro poderanse solicitar as axudas da Xunta para a compra de vehículos eléctricos ou de baixas emisións.
Así o anunciou a conselleira de Economía e Industria, María Jesús Lorenzana, tras reunirse en Pontevedra con representantes da federación de concesionarios en España (Faconauto).
Este plan de axudas, denominado 'Renova o teu vehículo', incrementa nesta edición o seu orzamento até os 3,5 millóns de euros.
A previsión é contribuír á venda en Galicia de 1.600 automóbiles eficientes con axudas de até 4.000 euros, que ascenden aos 4.600 se se trata de familias numerosas.
Lorenzana defendeu que a vantaxe deste programa, con respecto ao plan estatal Moves, é que é "menos burocrático" porque o pago da axuda faise directamente ao establecemento de venda, sen que o beneficiario teña que desembolsala previamente.
Ademais, os apoios danse en función das emisións e non do tipo de motor.
"É o que estamos a buscar: que en toda a cadea de valor vaiamos fomentando o vehículo moito menos contaminante", explicou a titular de Economía e Industria.
Este programa subvenciona a adquisición de vehículos novos, turismos ou furgonetas, que cumpran unhas determinadas características de emisións e que teñan un custo inferior ou igual a 42.000 euros (Impostos incluídos).
Esta contía amplíase até os 47.000 euros para vehículos eléctricos con autonomía maior a 30 quilómetros en modo eléctrico e en 6.000 euros máis cando se trate dun vehículo adaptado para a utilización de persoas con discapacidade ou se dispón de oito ou nove prazas.
Para poder acceder a estas axudas, en réxime de concorrencia non competitiva, será requisito imprescindible que o comprador acredite a baixa definitiva de circulación dun vehículo, que deberá ter unha antigüidade de, polo menos, dez anos ou de cinco se é unha furgoneta.
Cada particular poderá adquirir un único vehículo e, no caso de ser autónomo ou empresa, até un máximo de dez unidades.