Desde este martes, a Praza da Ferrería conta cun novo banco.
Trátase dun mobiliario moi especial, xa que estará instalado durante os próximos meses como elemento promocional dos Feroz 2026, que se volverán a celebrar en Pontevedra.
A gala será o próximo 24 de xaneiro, pero desde o mes de setembro haberá unha trintena de actividades previas relacionadas co cine e as series.
Este banco estreárono o alcalde de Pontevedra, Miguel Anxo Fernández Lores, e os edís Anabel Gulías, Eva Vilaverde, Demetrio Gómez, Alberto Oubiña e María José Abilleira.
A súa instalación coincide ademais coa época de maior afluencia de visitantes na cidade.
O goberno municipal busca así lembrar e promocionar que a Boa Vila volverá ser sede destes premios, cuxos primeiros detalles se desvelaron hai uns días en Tenerife.
A actriz e cantante Samantha Hudson será unha das catro persoas que conducirán unha cerimonia que, un ano máis, terá o Recinto Feiral de Pontevedra como escenario.