O Bloque Nacionalista Galego presentou este venres oficialmente a candidatura de Miguel Anxo Fernández Lores para revalidar a Alcaldía de Pontevedra nas eleccións municipais de 2027.
O actual rexedor, que acumula xa case tres décadas á fronte do Concello, compareceu acompañado da responsable local do BNG, Sabela Bará, quen destacou que a súa designación foi aprobada "por unanimidade e aclamación" pola Asemblea Local da formación nacionalista.
Bará definiu a Fernández Lores como "o orgullo dun proxecto colectivo" e reivindicou o modelo de cidade impulsado polo BNG nos últimos anos.
"Pontevedra é hoxe o mellor escaparate do que o nacionalismo galego é capaz de facer dende as institucións: transformar a realidade para mellorar a vida das persoas", afirmou.
A dirixente nacionalista sostivo ademais que manter a Lores á fronte do proxecto "é a mellor noticia" para a cidade, ao considerar que lidera "un modelo que funciona" e que "esperta ilusión e respecto non só aquí, senón tamén en todo o mundo".
Na súa intervención, Bará concluíu cunha mensaxe claramente electoral: "A mellor opción para Pontevedra é, sen dúbida, Miguel Anxo Fernández Lores. Con Lores, Pontevedra, a por todas".
Pola súa banda, Fernández Lores agradeceu o respaldo da militancia e confirmou a súa disposición a continuar liderando o proxecto nacionalista.
"É un compromiso que acollo con toda a responsabilidade", asegurou, lembrando que a súa continuidade dependía da decisión das bases do partido. "Sempre dicía que me presentaría se a militancia me elixía, e neste caso foi así", sinalou.
O alcalde avanzou ademais o lema da nova campaña, "A por todas!, Pontevedra", que definiu como "unha proposta para recorrer todos xuntos un camiño cara ao futuro".
Segundo explicou, a súa decisión de optar de novo á Alcaldía responde á vontade de culminar un proxecto político e urbano iniciado hai anos.
"Hai catro anos dixen que tiña na cabeza un proxecto para oito ou dez anos. Ese proxecto segue en marcha, non está acabado, e por iso sigo", indicou.
Fernández Lores fixo balance da xestión municipal dos últimos anos, destacando eventos internacionais celebrados na cidade, como os premios Feroz, concertos de artistas internacionais ou competicións deportivas como a Copa do Mundo de natación artística e as Series Mundiais de tríatlon. Ao mesmo tempo, repasou actuacións urbanas e ambientais en marcha, entre elas a renaturalización do río Gafos, o Parque da Parda ou actuacións nos barrios de Monte Porreiro, Mollabao, A Seca e A Parda.
O candidato nacionalista tamén puxo o foco na integración urbana da avenida de Compostela e na aposta ambiental do goberno local.
"Queremos seguir loitando contra o cambio climático e tamén pola recuperación integral da ría", afirmou, reiterando a posición histórica do BNG respecto á continuidade de ENCE. "Seguiremos loitando para que ENCE se teña que marchar da ría", declarou.
Durante a comparecencia, Lores reivindicou ademais o crecemento e a proxección internacional da cidade. "Todo o mundo quere coñecer como fixemos este proxecto entre todos", asegurou, incidindo en que Pontevedra "non ten teito" e aínda "queda moitísimo por facer".
O rexedor anunciou tamén que o acto oficial de presentación da súa candidatura terá lugar o vindeiro día 28, ás 20.30 horas, no Auditorio de Afundación, nun evento aberto á cidadanía co que o BNG pretende dar o pistoletazo de saída á carreira electoral.
Na recta final da súa intervención, Fernández Lores reivindicou a experiencia do equipo que o acompañou durante décadas no Concello e expresou o seu desexo de seguir contando con figuras históricas do goberno local como César Mosquera e Raimundo González.
"Hai moito coñecemento senior nestas persoas e non sería bo desaproveitalo", afirmou. Cun ton distendido, concluíu cunha mensaxe sobre o valor da traxectoria política: "A experiencia é un grao".
Engade Pontevedra Viva como fonte preferida de Google de balde
Mantente informado coas últimas noticias de actualidade.