Unha intensa tromba de auga deixou tras de si este sábado unha serie de pequenas incidencias na cidade de Pontevedra.
Algunhas delas producíronse en zonas afectadas habitualmente cando se produce unha importante acumulación de choiva, pero tamén se rexistraron noutros puntos do centro urbano.
Sucedeu ao mediodía e por espazo de menos dunha hora, tempo suficiente para provocar problemas ante a cantidade e intensidade de auga caída.
En concreto a Policía Local e os Bombeiros tiveron que actuar en Casimiro Gómez, onde a auga entrou en varios garaxes.
Ademais, segundo confirma o Concello de Pontevedra, tense constancia de balsas de auga en Fernando Olmedo, con problemas polo caudal do río Valdecorvos, así como en José Malvar, na Rúa Bibiano Fernandez Osorio ou na Avenida Virxinia Pereira.
A Rúa do Santo, en Lourizán, foi outro dos lugares nos que se rexistraron incidencias.
Tamén a auga fixo os seus estragos en Conde Bugallal afectando o paso do tráfico rodado a varias propiedades privadas.