Para o alcalde de Sanxenxo, Telmo Martín, o bus urbano que durante os meses de verán percorre o municipio é xa un servizo "irreversible e imprescindible".
E é que, no seu segundo ano de funcionamento, volveu a bater marcas.
En total, en agosto realizáronse 17.294 viaxes fronte aos 14.352 rexistrados no mesmo período do ano pasado, o que supón un crecemento do 20,50%.
Os días con maior número de viaxeiros rexistráronse na primeira quincena de agosto alcanzando até os 821 billetes.
O Concello realizou un investimento de 65.000 euros para os meses de xullo e agosto nas dúas liñas de reforzo integradas no sistema de tarifas único e bonificado activado pola Xunta.
As dúas liñas circulares percorreron o municipio durante xullo e agosto nun tempo estimado de 50 minutos, de 8:00 horas a medianoite, con até 32 frecuencias por día, de luns a domingo.
Unha transcorría dirección Vilalonga e a outra pola Lanzada, con saída e chegada á igrexa de Sanxenxo.
A liña máis utilizada durante o pasado mes foi a de Vilalonga con 8.945 viaxes con picos diarios de até 427 mentres que a da Lanzada rexistrou 8.349 con días de até 402 viaxeiros.
En total, as liñas de bus incrementaron o seu uso unha media do 30% respecto ao ano pasado.
En xullo realizáronse 16.741 viaxes, un 39% máis que en 2024, o que supón unha diferenza de 4.686 viaxeiros máis sobre os 12.055 de entón.