O Concello de Caldas de Reis quere que todos os nenos e nenas do municipio vivan a ilusión da chegada dos Reis Magos.
Este ano, ademais do tradicional desfile do 5 de xaneiro polo centro urbano, as Súas Maxestades de Oriente percorrerán as parroquias do rural caldense o domingo 4 de decembro.
Segundo explicou o tenente de alcalde e responsable de Festas, Manuel Fariña, a cabalgata do día 4 partirá á primeira hora da tarde cos Reis Magos montados en vehículos históricos decorados con motivos do Nadal, e visitarán todas as parroquias do municipio: Santa María, Arcos, Bemil, Carracedo, Godos, Saiar, San Clemente e Santo André.
En cada centro social haberá paradas para recoller cartas e repartir caramelos entre os máis pequenos.
O día grande, o 5 de xaneiro, terá lugar a gran cabalgata, que contará coas tres carrozas de Melchor, Gaspar e Baltasar, acompañadas por paxes, gardas reais, grupos de animación e a Banda de Música de Caldas.
O itinerario, deseñado para mellorar a visibilidade e comodidade do público, sairá do Paseo Román López e pasará pola Prazuela, García Baión, Constitución, Campo da Torre e Rúa Real, ata chegar á carpa das Palmeiras, onde os Reis recibirán os nenos e nenas para tomarse fotos e escoitar as súas peticións de última hora.
Ademais, nesta ocasión o Concello incrementará a repartición de caramelos lanzados desde as carrozas ata os 800 quilos, douscentos máis que o ano pasado. Todos eles serán sen gluten nin alérxenos.
Desde o Concello aínda están a buscar paxes que acompañen os Reis, polo que animan a todos os nenos e nenas a formar parte desta experiencia e participar nos talleres organizados para preparar o evento.
As inscricións poden realizarse ata a mañá deste venres na oficina de turismo.
Ademais, quen se apunte deberán acudir esta tarde e mañá sábado a un taller no Auditorio, onde recibirán instrucións e poderán elaborar adornos e complementos para os seus traxes.