Melchor, Gaspar e Baltasar buscan paxes reais para que os acompañen durante o seu percorrido por Caldas de Reis o vindeiro 5 de xaneiro.
A través do Concello, fan un chamamento a nenas e nenos para que participen nos obradoiros organizados para preparar o evento.
O tenente de alcalde, Manuel Fariña, subliña que o día será "espectacular e máxico", polo que fai tamén ese chamamento ás crianzas.
As nenas e nenos que queiran tomar parte da cabalgata teñen que tener máis de 6 anos.
Poderán apuntarse no departamento de Cultura do Concello (na oficina de turismo) ata o venres día 2 de xaneiro en horario de mañá.
Os días 2 e 3 de xaneiro, ás 17.00 horas, como paso previo a subirse ás carrozas, as e os paxes reais terán que asistir a un obradoiro no auditorio.
Alí, ademais de recibir as indicacións para saber o que teñen que facer, tamén poderán aproveitar para facer manualidades e adobíos para completar os seus vestidos.
A cabalgata do día 5 pola tarde contará coas tres tradicionais carrozas de Melchor, Gaspar e Baltasar nos seus tronos, acompañados das e dos paxes e gardas reais, e tamén da Banda de Música de Caldas, así como de grupos de gaitas.
Ao finalizar o desfile, os Reis Magos farán unha recepción real e nenas e nenos poderán falar con eles para lembrarlle as súas peticións.
Repartiranse en total máis de 300 quilos de caramelos sen glute e outras lambetadas.