A Garda Civil xa identificou o condutor do camión que, á primeira hora deste mércores, atropelou a un home de 48 anos en Campaño, causándolle a morte.
O camioneiro, segundo confirmaron desde a comandancia de Pontevedra, foi detido por un delito de homicidio por imprudencia e abandono do lugar dos feitos.
Así será debido a que, tras o atropelo da vítima, non se detivo a auxiliala e continuou a marcha.
Os axentes tratan de aclarar agora se o fixo porque polas dimensións do camión non foi consciente do atropelo ou se, pola contra, se deu á fuga.
O accidente rexistrouse ás 08:05 horas na rotonda situada nas inmediacións do polígono do Vao, na PO-531, onde a vítima estaba a traballar.
Até o lugar, o servizo de emerxencias enviou unha ambulancia asistencial de Urxencias Sanitarias de Galicia - 061, que atendeu ao ferido no lugar.
A pesar dos seus esforzos por salvarlle a vida, o home, que era veciño de Vigo, acabou falecendo.
O atropelo provocou longas retencións nos accesos a Pontevedra desde a estrada de Vilagarcía, moi concorrida a esa hora da mañá.
Engade Pontevedra Viva como fonte preferida de Google de balde
Mantente informado coas últimas noticias de actualidade.