O centro de saúde de Seixo, no municipio de Marín, careceu de atención médica a principios desta semana.
O espazo asistencial, que conta con dúas prazas de medicina de familia, acumulaba 37 días con un dos postos sen cubrir por mor da baixa laboral da titular do cupo marítimo.
A situación agravouse ao causar baixa tamén, por motivos de saúde, a única facultativa que permanecía activa e que asumía a demanda de ambos os dous cupos, que suman unhas 2.400 persoas adscritas.
Durante o martes, as urxencias médicas da poboación de Seixo foron derivadas ao centro de saúde de Marín.
A Plataforma pola Defensa do Centro de Saúde de Seixo e de Marín cualificou a situación de desatención e responsabilizou directamente á dirección da área sanitaria de Pontevedra e O Salnés e á Consellería de Sanidade por non prever a remuda da primeira baixa, iniciada o 1 de xuño.
Ante esta situación, a Plataforma ten previsto organizar protestas ante o incremento das listas de espera e a falta de persoal.
Pola súa banda, José Flores, xerente da área sanitaria de Pontevedra-O Salnés, explicou nas últimas horas que a ausencia da segunda médica supuxo un feito imprevisto que non permitiu activar unha cobertura inmediata o mesmo martes, aínda que asegurou que a actividade quedou restablecida a partir deste mércores.
A dirección asistencial admitiu que a primeira licenza médica non se substituíu durante as últimas cinco semanas, pero atribuíu esta circunstancia á inexistencia de profesionais en medicina familiar e comunitaria dispoñibles nas listas de contratación.
Flores sinalou que a escaseza de profesionais dificulta a cobertura de baixas, permisos e vacacións, especialmente durante o período estival, un escenario no que o servizo se mantén grazas ao incremento de quendas por parte do persoal activo.