O Centro Cultural Antonio Fraguas, en Carballedo, foi escenario do acto institucional de Cerdedo-Cotobade con motivo do 8 de marzo, Día Internacional da Muller.
Unha xornada coa que reforzar o compromiso municipal pola igualdade recoñecendo a mulleres que contribuíron a mellorar a vida dos seus veciños.
Nesta ocasión Cerdedo-Cotobade homenaxeou catro mulleres que deixaron pegada nas súas parroquias e no conxunto do municipio.
Elas son Carmen Rodríguez Puente, Manuela López Leiro, Urcesina Cabanelas Pérez e María Teresa Prado Sueiro.
"Este recoñecemento é unha mostra do respecto e da gratitude que sentimos cara ás mulleres que, co seu traballo silencioso e constante, contribuíron a construír o noso concello e a facer máis forte a nosa comunidade", asegurou o alcalde, Jorge Cubela.
"Representan a tantas mulleres que ao longo da historia sostiveron a vida social e económica das nosas parroquias, moitas veces desde o esforzo diario e sen buscar protagonismo", engadiu.
A modo de obsequio, entregáronlles unha placa conmemorativa, un camelio procedente da Estación Fitopatolóxica do Areeiro e un agasallo.
Carmen Rodríguez Puente, de San Xurxo de Sacos, foi muller emprendedora que dinamizou a contorna a través da súa sala de festas, restaurante e hostal. Manuela López Leiro, de Tenorio, é un referente do comercio local tras toda unha vida dedicada á Mercería Lita. Urcesina Cabanelas Pérez, de Aguasantas, foi propietaria dunha tenda de ultramarinos convertida durante anos en punto de encontro para a veciñanza. No caso de María Teresa Prado Sueiro, de Cerdedo, foi toda unha pioneira como condutora de autobús nun sector tradicionalmente masculinizado.
O acto contou coa colaboración da Federación de Mulleres da Provincia de Pontevedra (FEMUPO), coa actuación musical da pianista Andrea García González e con detalles conmemorativos elaborados pola Asociación EVD de Muller e Discapacidade.
