O goberno municipal de Pontevedra destinará case 463.000 euros a un programa de actividades de formación para o sector turístico baixo o paraugas de Pontevedra Capital Gastro.
Buscan así afianzar o papel do mercado de abastos pontevedrés como "escaparate" do produto de proximidade e de calidade.
Esta iniciativa está incluida no plan de sostenibilidade turística de Pontevedra, financiado con fondos europeos Next Generation.
Así o explicou este mércores o alcalde de Pontevedra, Miguel Anxo Fernández Lores.
As actividades de dinamización incluidas neste programa deberán completarse no prazo de doce meses.
Fernández Lores destacou que con esta ferramenta o Concello quere fomentar a cultura gastronómica baseada no produto sostible e de proximidade, contando coa praza de abastos como "elemento nuclear" de todas estas propostas.
Haberá, por un lado, cursos de formación para o sector turístico, no que se ofertarán iniciativas para avanzar na dixitalización dos profesionais, na innovación en materia gastronómica ou no traballo con novos produtos e novas técnicas.
A segunda liña de actuación pretende poñer en valor o produto de proximidade, obtido no mar e na terra, ademais dos oficios tradicionais, apostando por unha maior dinamización deste espazo comercial e gastronómico.